2009.11.16 12:19 | Waiţāsenei ezze kintuppans be kērdas jusnan TikrintunCitātun
Nx	Kaīls! As kwaitīlai perwūkautun eraīnan en PRŪSISKAN SENJĀSENIN en Kwēdinan (Pameddi), kawīds wīrst audāwuns si en dēnamans 28-30 sallawas 2009. Malkai: http://www.wix.com/fyrfos/ulotka-1 Sīriskai, Nērtiks (ōrganizatōrs)

2009.11.16 17:32 TikrintunCitātun
Glabbis	Nērtik, mennei ast interessanti kawīdan kintuppan tū tulkauwuns prūsiskai? As ni turri wīzan jātwei.

2009.11.16 21:06 TikrintunCitātun
peteris92	Wīza, sta ast problaman, paggan arāikai prūsai ni mazzi ebtiktun si...

2009.11.17 08:43 TikrintunCitātun

Nx

Kaīls! Teinū turrimai dwāi kintuppans: primas: Ofelaš(ēng. Pathfinder) - pirmas kintups en Sāmi billin, tūlin šamanizmas be magījas stwen. āntars: The Inaccesible Pinnacle - ōrginals gaeliskai, ezze tītin kawīds gērdaui swāise nepūtu gaeliskans istōrijans. As turri etwertan tūlkausenin stesse filman: "Kukushka" (kwēi erōjai bilāi en trimmans billins). Akiwīstai, pirzdau mettan bēi eznāunu perlazītan "Ērks Mānts". As dīgi planaui din segītun, tēr mi būlai prawerīngi .avi wersiōni sen ēngliskan tulkausenin. Kintupps - mazīlai Tū eīskintun min šisse wīrdas pertiksenin? Grāudu, kāi Tū ni turri wizan. Mazīngi ainunts kits iz Sēmban mazīlai būtwei? Ni prewērpjamai, kāi Šengen - nāuna gelzaīna kurtā delinna prūsans.

2009.11.17 17:36 TikrintunCitātun

Glabbis

Jā, sta ast spārts labban ebgērdautun (dublītun) kintuppans prūsiskai, adder teinū mennei aktuālais - malnīkiskai kintuppai. Be prōblaman, kāi per malnīkans ast nitūlin labāi kintuppai adder animaciōnis. Ka ast "kintups", as akrāts ni waīda, adder mazzi būtwei sta ast "kino + gr. topos (deīktan)" s.a. kinoteāteris. Be kāigi mes tērpauimai stan wīrdan "nitikrōmiskai" - sta ast zentlisnas trānsferis ezze ainasmu prēi kittan, s.a. ezze subsmu kino buttu prei stan, ka ast na kino buttas ekrānan. Kaddan en kino buttu ast kino, staddan pastippan kino buttan īr ast kino. Be wīrds "kintups" ast biskin egzōtiskan, ni spārts eīsku, stesse paggan tāns perwaidinna si kāigi ka nika swāise, adder ni stawīdan internaciōnalin kāigi "films". Be ka ni ast pastippai eīsku, sta mazzi spārts lāngu perēitwei ezze ainasmu prēi kittan. "Ofelaš pirmas kintups en Sāmi" - tū mīri sta ast sāmiskai anga sōmiskai? Gēliskans istōrijans as dīgi ni widāi. Stwen en Ēirijai anga en Škōtijai? Ezze "Geguzzin" as dīgi nika ni kirdīwuns. Ka stwen ast? Kawīdas billas? Adder tū ebgērdauwuns sen swāise tārin anga tēr papeisāwuns subtitrans? Kasse paggan jūs ni bēitei regisrīwusis pīran? Jūs pat kwaitīwusis, kāigi as waīda.

2009.11.17 18:55 TikrintunCitātun

Nx

Kaīls! As tēr tulkai nōpeisāsenins. Būlai labbai aīnan kērdan segītun dīgi dubbingan. Sen filmans per malnikans teinū ni ast labbai - tēr japaniskai anga amērikaniskai idiōtizmai. As mīri, kāi ukawālnai būlai segītun dubbingan per wūrans mōskaliskans animaciōnins - šas garbīkas bēi spārtai amziskai, mitiskai. As mīri, kāi stwen mazīngi aupaltun tūlin baltiskan folklōrin, beggi mōskaliskas folklōrs en zēimiskai Mōskalijan ast en debīkai delīkan baltiskan. Ka Tū mīri? Sen pīran wissadan bēi stawīda situaciōni, kāi ast mazīngi pēnkei zmūnei gattawai senrīnktwei si kaddan prawerru. Wisāi kitāi bilāi, kāi tūlin kwaitēi, adder mazzan segēi. Situaciōni maināi si biskin teinū - en pōliskasmu delīkan trīs nawwai zmūnei bilāi prūsiskai, ripīntei ketturei-pēnkei pagaūne mukīnsnan be ast gattawai būtwei na swintikans be ebtiksenins. Sen tennans mazzimai ka nika segītun, šlaitawīngi, kāi ast situaciōnis, kāi ainunta ōficiala fōrmi ast prawerīngi - laukīntei deīktan per līskan, anga peisātun prōtestan priki wārgan etwaidīnsnan stēisan wūran Prūsan. Mazīngi niilgai wīrstmai turīwusis pīran, turīwusis ainuntans penningans per mūisesans prōjaktans be t.t. Ofelaš ast pirmas films sāmiskai be gērdaui ezze Sāmi zmūnins: http://en.wikipedia.org/wiki/Pathfinder_(1987_film)

2009.11.17 20:17 TikrintunCitātun
krieger	Kaīls, Nērtik, kasse pagan Tū mīri kāi japāniskai kintuppai ast idiōtizman? Stwen ast Hayao Miyazaki, tāns ni ast wārgan (prei perwaidīnsnan, padirēis "Prēikeni Mononoke" [Princess Mononoke], "Māise kaimīns Tōtoro" [My Neighbor Totoro ] anga "Aupīstai pra naseīlins" [Spirited away]). Sta ni ast wargā wariānti per malnīkans. Be mennei perwaidinna si kāi "Narnijas krōnikis" ni ast wārgan.

2009.11.17 23:37 TikrintunCitātun

Glabbis

Wōi, ik ni ebgērdautan (s.a. ni ast prūsiskai gērds), sta ni ast labban. Teinū zmūnimans prawerru tūls klausītun. Izpretīngi, mackālija kāigi etniska gruppi ni egzistijja. Stwen ast tūlin wissan. Eīsku, kāi "baltai" stwen ast, mazzi būtwei, ni tēr genētiskai, tīt dīgi sen swāise pajuksmans be palīgu. Adder wissan pirman, as kwaitīlai ebgērdautun prūsiskai ka mes turrimai iz oficiālins "baltans". Pvz., wūran laītawiskan kintuppan "Adli, angzdrin kunnegini" be dabber palīgu ka ast, arwiskai, sen nōrmalins baltiskans elamēntans. Adder pēr stan mennei prawerru gaūtun wīzan. As prasīwuns ezze niregistrītan pīran beggi sta ast wariānti kaigi gaūtun ilgans wīzans niplatīntei pēr dins. Sistēma ast stawīdan, kāi prawerru turītun sendraugidīlasnas sawāitin sīrzdau dwāi organizaciōnins. Mes ni turrimai prūsiskan oficiālin organizaciōnin (beggi stwi sta ast rīziku), adder turrimai stawīdan kultūriskan. Jā, Mijazakis "Aupīstai pra naseīlins" mennei spārts padīnga. Nipadīnga kāigi japōniska animaciōni empīriniskai pastāi glaubātan, adder subs prāts ast, arwiskai, spārts labban. Turrimai laītawiskai. Kaddan as dirīwuns, mennei bēi īr stawīds mīstiskas šōks, kāigi stwen wissan retawīngi be spārts kōmplicitan..

2009.11.18 11:12 TikrintunCitātun

Nx

Kaīls Krieger! As prēitara, as nikwēigi ni turēi kantan dirītwei japāniskan animaciōnin ērgi wāngan - stwen wisāi krīkste, wisāi dēlbja si. Mazīngi as ni asma suīt subtelin, kāi widātun stwen ka nika tūls. As īr ni waīduns, kāi "Adli - anzgzdiri kunnegini" ekzistijja kāigi laītawiska animaciōni. Sta ast spārtai labbai. As mīri, kāi ni būlai prōblaman segītun dubbingan, tēr prawerru turītun labban mikrofōnan be drukkautun peisātan tulkasenin. Glabbi, wīrstmai dirīwusis pa ebtikseņu. As nadrūwei kāi enwāngan turīmai suīt kōnkretans zmūnins, sen kawīdans mazīmai segītun ka nika ōficiālin. Prēi mans dīgi sta turri būtwei tēr kultūriskai-ekalōgiskan. Ik būlai stwen peisātan ka nika ezze amziniskwan, pōliskan līgan ni dālai nūmans registrītun pīran.

2009.11.18 12:25 TikrintunCitātun

Glabbis

Ni, Adli ni ast animaciōni, adder malnīkiskas kintups. Animaciōni ast, adder ast tēr nawwan, spārts insan be stawīdan abstraktan, sen Kūlgrindas muzīkan, kawīda stwen pastippai "ni en tēman". Tū mazzi padirītun. Autengīnsna ast en sekciōnei "Kintuppai" en fōru. En Mijazakis animaciōnei tenēi ni krīkste, adder tēmai deznimai ast spārts mīstiskan. Jā, nūse organizaciōni ast dīgi kultūriskai-ekolōgiskan.

2009.11.19 17:15 TikrintunCitātun

Nx

Kaīls! Ik Tū turīlai malnikiskan filman, mazīngi pratulkautun be preidātun prūsiskan gērdan. Per min būlai prōblaman tulkautun iz laītawiskan. As turīlai laukītun šins japāniskans filmans be dirītwei subs. Adder as mīri, kāi kittan mistīkin mazīngi izprestun ni per gillu, šlaitawīngi ik ni zinnimai billin - bilā ast klaūtan per mistīkin. As mīri dīgi, kāi kitā zemē teikāi kittan mistikin. Stesse paggan as mīri, kāi per mans pints prei mistīkin wedda pra billin be baltibin. Akiwīstai, labbai zinātun kittans kultūrins, adder as mīri kāi tennas wīrst palikkušas per mans ni pazinaminan, kāigi per šins zmūnins nūsa kultūri.

2009.11.19 22:25 TikrintunCitātun
Glabbis	Ja, stwen biskin retawīngi. As dirīwuns biskin kāigi egzōtiki. Adder stas Mijazaki spārts eurōpiskas zmūi, kāigi as paprettuns. As ni bilīlai, kāi stwen ast įtīt gillu, adder interessanti be eraīns kintups ēit spārts ilgai.

2009.11.20 06:12 TikrintunCitātun
Nx	Sta ast japāniskai - as kirdēi, kāi ōrgnala wersiōni stēisan "Septinnin Samurājai" wērau astōnins stundins. Tīt ilgai japānimans padīnga dirīwei na filmans. Per mans rettawingi be niizprestaminan. As mīri, kāi en tenessei kultūrei kerdā ast izprestan kitawīdai - ainapāusiskai ēst sklawiskan dīlin eraīnan dēinan, kitapāusiskai astōnistundiskai filmai.

2009.11.20 11:24 TikrintunCitātun

Glabbis

Izpretīngi, kāi erainā tradiciōniska kultūri turri turītun tēr swāse kultūriskans kōdans. Be tēr stan amzin mazīlai pastippai paprestun stans kōdans. En stesmu be ast subba astis. Tīt īr turri būtwei. Nūmans īr ni prawerru paprestun tenēisan kultūrin ērgi wangan. Sta ast nimazīngi. Mes turrimai kittans kōdans. Adder kitapāusiskai tenēi, mazzi būtwei, tūls waīda ezze stan ka ast kerdā be kāigi prawerru dirītun en kērdan. Kasse paggan ni? Tenēi ni turēi tīt tūlin wārgan iz eurōpiskans mōderniskans ideolōgijans, pa kawīdans prawerru spārtai spītwei. Tīt dīgi mennei bēi interessanti padirītun ezze stan mergīkan Šichīran ("Aupīstai pra naseīlins"), beggi stwen dīgi ast stāi subbai pūkjai (aitwarāi), wīlis (naseīlai), kawīdai buwinna per undan. Pīrts ast dīgi mitolōgiskan deīktan, kāigi prēi mans. Wissan ast spārts palīgu. Interessanti padirītun kawīda realizaciōni sen stans erōjans mazzi būtwei prei japānans. Nērtik, ni padīriwuns tū dabber nawwan "Adlin"?

2009.11.20 18:39 TikrintunCitātun

Nx

Asma dirīwuns šan Adlin šlai gērdan. Spārtai grazzu grafiki - ni per kōmplicitan, adder amzniskan, mitalōgiskan. Per min wārgan kāi šlāit gērdan. As waīda šin gērban sen bilītans wērsans, ikāigi dāinans: "Angzdris, angzdrīke, ik tū gīwa spāina ast gaīlin, angzdris, angzdrīke ik tū aulaūwuns spāina ast wūrmin." Dīgi wissan bēi per min per spārtai īnsintan. As ni asma dabber aupalluns šin nōrmalin (niainimacīoni) kintuppan ezze Adlin. As mīri, kāi kērdas jūsna ast sēitan zen zēimiskwan. As bēi en Barcelōnai be stwen nikwēigi ni ast zegērei, īr brendu widātun tennans en gelzapintis dwāramans. Ku tālis pusidēiniskai, stu pastippan mettan perwaidinna būtwei nikitawīdinantin. En Afrikai zmūnei ni jāute kērdan, wisaddan ast īdis. Adder prei mans prawerru sītun be pjāutun en spārtai kōnkretans kīsmuns. As wisaddan jāute en wassaran, kāi dabba kitawīdina si dīwais nikāi as mazzi nadirītwei tennan - pa aīnan sawaītin wissan jāu ast kittan en meddju anga en weīsimans. Aīnai kwēitei jāu auwertan, nawwai jāu etwertan.

2009.11.20 20:43 TikrintunCitātun

Glabbis

As nitikrōmiskai peisāwuns "ebgērdautun". "įgarsinti " būlai "enkalsīntun". As jāu enpeisāwuns en deīktiskan wirdeīnan. Adder kasse paggan tū dirīwuns šlāit gērdan? Stwet pat ast kūlgrindiskas gērds. En Kunnegsgarbu dīgi nikwēi ni ast zēgerei. En Mīmelai zēgerei ast, tēr spārts deznimai niainunts zēgeris ni dīlai. Adder as bilāi ni ezze stan. Kāi kweitēi be garēi sparts dīwai kweitāi - sta dīgi ni ast swarewīngi, beggi stwi mazzi būtwei pastippai kitā dirā. Teinū, ppw., mes bilāimai ezze kintuppans be ezze kērdan en kintuppamans. Ka ast kintups be empīriniskai - kunsta? Sta ast stawīda māgija anga ka nika en māgijas deīktu. Be sta pastāi teīktan per stawīdans zmūnins, kawīdai ni kwaitēi segītun nika māgiskai en realitātei. S.a. kunsta ast tēr līkuta adaptaciōni per realistans, pōzitiwistans, atteistans be palīgu. Be stawīdai zmūnikai, wīrikai mazzi sindītwei 8 stūndins, dirīntei kintuppan be ni justun stan Waīdawan, kawīda ast bilītan - "realitāti". Ni justan kērdan, kai en tenēisan Waīdawai kweitēi tīt cikliskai kweitāi. Mazzi būtwei, ik zmūi, arwiskai, ka nika segēi na swāise nōseilawingiskan pintin - staddan kweitēi kweitāi spārts ilgai. Aīns kwēitis kweitāi pastippan prābutiskan. Mazzi būtwei tēr tū wīda wissan per dīwai?

2009.11.21 09:10 TikrintunCitātun
krieger	Dabber ast interessanti Mijazakis "Prēikeni Mononoke". Tenā (Prēikeni) ulinna sen zmūnints be ginna swāise meddin (be meddes neseīlin). Mennei spārts padīnga. As ni mīri kāi stwi kitā kultūri "turri swarewīngin zentlisnan", beggi sta ni ast spārts nōseilawingiskas kintups. Eīsku, kāi kintups sendest si iz "tradiciōniskans dabbans / elamēntans". Adder kāigi as papresta stwi nika ni ast . Jā?

2009.11.21 09:55 TikrintunCitātun

Nx

Kaīls! Perarwi, weīšai en Prūsai kitawīdina si spārtai. Aīna sawaīti ast suīt kāi wissan kitawīdinlai. Šas dīwas kitawīdisnas en weisīmans ast dabber pirzdau Pergrūbrin, kaddan medēi dabber ni pagaūne būtwei zallin. Stwi en nūsamans turmans wiskwēi ast zegērei. Aīnan ejāi, kitāi ni, adder tenēi ter etswāikstinna dabbas zegērins, kawīdai ast en Prūsai (be kittans zēimiskans tāutans) spārtai widāminan. Widāis teinū - mazzimai skaitātun kērdan iz labban bārwin, iz azzaran bārwin, iz pippelin etsrāisenins. Teinū bēi mazzan krimmas en meddju beggi passali pergūbi per ankstāis. Adder sta bēi skaitāminan jāu en daggas wāngai - gērwis en šismu mettan etskrāida sawaītin pirzdau assanis swintikans, jāuku etskraida en assanis swintikans. As asma realists - wissan grazzu, magījan ast en šismu swītan. As zinna zmūnins, kawīdai bilāi kāi swītan ast wārgan be tēr Dēiws mazzi nūmans pagalbtwei (nūss drāugs ginni). Adder as ni mūka izprestun stawīdan dīran. Jā bēi gērds en Adlin, adder nika ni bēi bilītan. Turri tu autengīnsenin prei nianimītan Adlis wersiōnin?

2009.11.21 10:00 TikrintunCitātun
Nx	Asma kitawīdinuns šisse tēmas tītelin, be paāntrinuns ebgērdausenin.

2009.11.21 12:52 TikrintunCitātun

Glabbis

Ni, stwi ni mazīngi tikrintun tēman en katalōgu ūnzai. Fōras sistēma ni dīlai labbai. Prawerru prasītun - mazzi būtwei Mānts segīlai ka nika stwi. As kwaitīlai prasītun - Nērtik, kasse paggan tū turri tīt tūlin blāndans sen akcēntans. Tū jāu spārts wūrai peisāi prūsiskai. Tū turri waīstun kāigi wirdāi kalsāi. Dirēis - tīt tū waidinna per kittans - kāigi peisātun be bilītun nitikrōmiskai. Nū, mazīngi pat dirītun wirdeīnan.

2009.11.21 18:08 TikrintunCitātun
Glabbis	Ezze kintuppans - jāmai en sekciōnin "kintuppai"

2010.03.29 06:53 TikrintunCitātun

sebastijans

Nu as miri, šin pāusan, kan astei segiwusis, ast sparts labban. Nu wirstei jus tulin segiwusis sen pāusan? Stesse paggan stan bulai ukalabbaisin ik mazzilimai stwen peisātun prusiskai be wāitjatwei ezze nawwiskwans be stawidan. Be digi kwaitilai waistun, kas ast šin pāusan segitun? Ast mazziwingi, segitun prusiskas alfabētan šāi en pāusu, pēr mans, kwāi ni mazzimai peisātun sen prusiskans litterins. Wissan grazzu, juse ginni Sebastijans

2010.03.29 23:21 TikrintunCitātun

Glabbis

"Nu as miri, šin pāusan, kan astei segiwusis, ast sparts labban. Nu wirstei jus tulin segiwusis sen pāusan? Stesse paggan stan bulai ukalabbaisin ik mazzilimai stwen peisātun prusiskai be wāitjatwei ezze nawwiskwans be stawidan." - Etwinūis, Sebastjān, ezze kawīdan pāusan tū bilāi? Ezze šin fōran? "Be digi kwaitilai waistun, kas ast šin pāusan segitun? Ast mazziwingi, segitun prusiskas alfabētan šāi en pāusu, pēr mans, kwāi ni mazzimai peisātun sen prusiskans litterins." - Kawīdan alfabētan tū teinū mīri? Stawīdan "runniskan" anga kawīdan?

2010.04.01 08:08 TikrintunCitātun
sebastijans	http://www.wix.com/fyrfos/ulotka-1 na stan pausan as miri. be as miri na stan latiniskan alfabetan adder sen wissans shans: sh zh aa uu ee ii oo be stawidans. Nu ter miri, sta mazingi bulai prastais.

2010.04.17 06:28 TikrintunCitātun

Nx

Kaīls Sēbastijans! As wīda, kāi Tū peisāi prūsiskans litterans. Ast sta prōblaman per Tin? Prawerru en kōmputeru preidātun lattawiskan klawiatūrin be enklaūtun din. Mazīngi ainuntkaddan būlai labban turītun ASCI kōdan, kāi peisālai prūsiskans zentlins: aa, ii, rj, kj, nj, sh, zh, zj be t.t. Nūss perwaldītajs Mānts mazīlai īr tīt segītun en kōdu, kāi sta būlai autōmatiskai kitawīdintan en prūšiskans litterans (ā, ī, ŗ, ķ, ņ, š, ž, ź). Mīri Tū, kāi sta ast prawerīngi?

2010.04.19 12:38 TikrintunCitātun
sebastijans	jā as mīri:)

2010.04.23 16:12 TikrintunCitātun
Glabbis	Perwaidinnas, Sebastjāns jāu turīwuns stans wissans zentlins ā, ī, ŗ, ķ, ņ, š, ž. Be tāns kwaitēi gērdautun, kāi prawerru peisātun šlāit stans zentlins? Adder as ka nika ni paprettuns?